Bielarus.net
Плятформа «Беларуская Салідарнасць»
Плятформа «Беларуская Салідарнасць»
|
|
||
|
|||
|
Bielarus.net Плятформа «Беларуская Салідарнасць» |
||
|
Зянон Пазьняк Сёньня ізноў, як заўсёды, мы адзначаем Дзяды – Дзень памяці продкаў. Я хачу нагадаць, якое вялікае гэта мае значэньне – шанаваць памяць продкаў. Зірнем на нашае нядаўняе мінулае. За саветамі здавалася, што нішто ня здолее ўжо ўскалыхнуць сьведамасьці задушанага, заснулага беларускага грамадзтва. Але праўда пра Курапаты, сьведчаньне пра генацыд, пра тысячы нявінна забітых людзей разбудзіла беларускае сэрца. Народ адгукнуўся жалем, прачнулася ў ім прага справядлівасьці і адплаты за перажыты зьдзек. Праўда пра Курапаты дала штуршок новаму беларускаму Адраджэньню. Адсюль, з мартыралога нацыі, пачаўся вызвольны рух, утварыўся Народны Фронт, які вярнуў дзяржаўную незалежнасьць Беларусі, расказаў пра Чарнобыль, аднавіў гістарычныя сымвалы нацыі. Расейцы-бальшавікі забілі мільёны мірных беларусаў. Яны хацелі задушыць Беларусь і назаўсёды зьнішчыць беларускае Адраджэньне. Тут, у Курапатах, яны стралялі ў патыліцу людзям Беларусі, думаючы, што масавымі забойствамі спыняць нашу гісторыю. І што ж атрымалася? Калі вырасла новае пакаленьне беларусаў, нашы закатаваныя расстраляныя дзяды паўсталі з небыцьця і паказалі нам шлях. Ад нас патрабавалася толькі адно – памятаць. І калі памятаем – яны дапамогуць. Калі памятаем і шануем – яны несьмяротныя. Вось дзе духоўны закон гісторыі і лёгіка вечнасьці – маральная памяць пра пакаленьні. Калі за плячыма дзяды – багаслаўлены наш шлях. Ідзем жа па ім упэўнена, змагаймася за гонар Беларусі! Хіба ня чуеце, як тут разам з усімі лунае дух Васіля Быкава, як гарыць ягоная сьвечка, як апусьціліся побач душы сяброў – незабыўнага Міхася Дубянецкага, прасьветленага Яўгена Куліка, вясёлай Веры Церлюкевіч, дабрадушнага Уладзімера Кармілкіна… Вечная памяць. Але парадуемся разам. У нас яшчэ даўгі шлях на гэтай зямлі і сьветлая будучыня ўсеагульнай беларускай радасьці, калі спадзе, абваліцца, сканае цёмнае дурноцьце і згіне ўсялякая дрэнь. І добрасьць наша будзе дасканалай… Дзяды, дзяды, успамажыце. 31/10/2004 › Навіны |
Навіны ‹ Пошук:Каляндар:Ідзі і глядзі:НАРОДНАЯ ПРАГРАМА «ВОЛЬНАЯ БЕЛАРУСЬ» С. Навумчык. «Сем гадоў Адраджэньня, альбо фрагмэнты найноўшай беларускай гісторыі (1988-1995)» З. Пазьняк. «Прамаскоўскі рэжым» Зянон. Паэма «Вялікае Княства» З. Пазьняк. «Развагі пра беларускія справы» Курапаты — беларуская сьвятыня Збор фактаў расейскага тэрору супраць беларусаў З. Пазьняк. «Беларуска-расейская вайна» «Гутаркі з Антонам Шукелойцем» (PDF)
Беларуская Салідарнасьць:ПЛЯТФОРМА НАРОДНАГА ЯДНАНЬНЯ. 1. Беларуская Салідарнасьць гэта ёсьць плятформа Беларускага Адраджэньня, форма ідэйнай лучнасьці паміж беларусамі і пазыцыя змаганьня з акупацыйным антыбеларускім рэжымам. Яе дэклярацыя салідарнасьці простая і надзейная, па прынцыпу Каліноўскага: 2. Зьместам беларускага яднаньня ёсьць Беларуская нацыянальная дзяржава. Сымвалам Беларускай дзяржавы ёсьць нацыянальны Бел-Чырвона-Белы Сьцяг і гэрб Пагоня. 3. Беларуская Салідарнасьць стаіць за праўду Беларускага Адраджэньня, якое кажа: «Не правы чалавека — галоўнае для беларусаў, а незалежнасьць і свабода, бо не бывае „правоў чалавека“ пад акупацыяй». Трэба змагацца за свабоду і вызваленьне Беларусі, а не прасіць «правоў» у рэжыма і акупантаў. Акупанты правоў не даюць. Яны пакідаюць нам «права» быць рабочым матэрыялам дзеля іхных імпэрскіх інтарэсаў. 4. Беларуская Салідарнасьць сцьвярджае і абараняе дэмакратычныя каштоўнасьці народнага агульнанацыянальнага кшталту, якія мусяць шанаваць і бараніць усе беларусы перад небясьпекай агрэсіўнай пагрозы з Расеі і перад палітыкай антынацыянальнага рэжыму Лукашэнкі на Беларусі. 5. Беларуская Салідарнасьць мацуе грунт, кірунак дзеяньняў і ідэі беларускага змаганьня ў абарону беларускай незалежнасьці, мовы, культуры, беларускай нацыянальнай уласнасьці, маёмасьці і беларускай дзяржаўнай сістэмы дэмакратычнага існаваньня нацыі. 6. Усіх беларусаў як нацыю злучае і яднае беларуская мова, беларуская гісторыя, беларуская зямля, беларуская культура, беларуская дзяржава і ўся беларуская супольнасьць людзей — Беларускі Народ. 7. Усе беларусы, незалежна ад сьветапогляду і палітычных кірункаў, яднаюцца дзеля абароны беларускіх каштоўнасьцяў, беларускіх сымвалаў і беларускіх нацыянальных інтарэсаў. 8. Формы дзейнасьці Беларускай Салідарнасьці могуць быць рознымі, але заўсёды павінна ўлічвацца антыбеларуская палітыка прамаскоўскага рэжыму на Беларусі і пагроза нашаму нацыянальнаму, культурнаму і дзяржаўнаму існаваньню. Таму ва ўсіх справах — Беларусь перад усім. Трэба шанаваць усё беларускае. Шанаваць беларускую дзяржаўнасьць. Шанаваць беларускую мову і беларускі народ. Шанаваць беларускую зямлю і беларускую культуру. Шанаваць здабытак народнай працы. Беларус беларуса мусіць бараніць перад небясьпекай. Беларус беларусу мусіць дапамагаць. Беларус беларуса павінен падтрымліваць паўсюдна на Беларусі і ва ўсім сьвеце. Сябры й партнэры:
|
Беларуская Салідарнасьць // 2000—2024 |
