Факты і падзеі (6-8 сьнежня 2005 г.)

На фоне шалёных посьпехаў эканомікі РБ 5-6 сьнежня адбыўся візыт у Кітай. Начальнік паведаміў нам: “Як важна арыентавацца не на Захад, а на Усход!”
Яму, мабыць, скора нададуць тытул мандарына (так называлася кітайская шляхта) за абяцаньне заваліць Кітай беларускай бульбай. Спадзяемся, што хаця б па адной бульбіне дастацецца кожнаму з мільярда з паловай кітайцаў. Яго запрасілі быць назіральнікам таксама ў Шанхайскай арганізацыі разьвіцьця. Сапраўды, цудоўная альтэрнатыва ў параўнаньні з нейкай там эўрапейскай цывілізацыяй. “Там главнымі такіе азіатскіе страны, как Россія і Кітай.—гукаў па БТ шкловец.– Там ядерные державы Індія і Пакістан. Кітай – наш велікій сосед …” Да-а, сабралася кампанія, нас толькі там і не хапала.
Вярнуўшыся ў Беларусь, начальнік пасадзіў на ланцужок яшчэ адзін прафэсійны цэх. Загадаў, каб мэдычныя работнікі адпачывалі толькі на тэрыторыі РБ. А хто зьбіраецца замяжу, каб прасілі дазволу ў міністэрства аховы здароўя. На ланцужок ужо пасоджаныя студэнты і школьнікі, ім таксама трэба прасіць дазволу у сваіх міністэрствах. Ня кажам ужо пра вайскоўцаў і дзяржаўных служачых нізкага зьвяна, для тых даўно ўжо існуюць толькі сібірскія тропікі. А вышэйшае зьвяно Эўропа сама да сябе не пускае. Ізаляцыя, арганізаваная па загадзе з Масквы, паступова апускаецца на галовы нашых грамадзянаў. А яны нават ня чухаюцца: “А мне всё равно, я же не студент ілі врач”. Нічога, дойдзе да ўсіх чарга. Дойдзе чарга і да Расеі, якая пачне прышчапляць на сваіх грамадзянах вынікі лябараторнага экспэрымэнту, праведзенага ў нас. Пакуль жа расейскія турысты і мафіёзі шумна вырабляюцца на ўсіх курортах сьвету.
7 сьнежня ў Маскве зноў адбыўся выбух у жылым шматпавярховым доме. Людзі, думаючы, што зноў ФСБ “проводіт ученія”, выбягалі на двор босыя і голыя. Выбухам разьнесла амаль цэлы пад’езд, загінула тры асобы, цяжка паранена чацьвёра, 50 асобаў эвакуіраваны. Пракурор у залатых пагонах паведаміў па тэлеканалах, што віной усяму выпадковы выбух бытавога газу. А жыхары зь ім не пагаджаюцца. Кажуць журналістам, што ў апошнія дні ў адной з кватэраў працавалі гастарбайтэры з Сярэдняй Азіі, “пілі круглымі суткамі, прыцягнулі з сабой газавы балён для зваркі, вось ён і выбухнуў”. Ну, па-першае, не вядома яшчэ, што ў доме загінулі нейкія азіяцкія рабы (яны па лёгіцы павінны былі б стацца першымі ахвярамі выбуху балёну). Па-другое, у жыхароў імпэрскай сталіцы ўжо склаўся ўстойлівы стэрэатып грэблівага стаўленьня, часьцей — лютай нянавісьці да людзей з былых калёгіяў, якія ўкалываюць на іхнай тэрыторыі. Вядома, аднак, што праца бяспраўнага раба ніколі не вызначалася высокай якасьцю (у тым ліку і захаваньнем правілаў бясьпекі). Дэмаралізаваная Масква няздольная ўжо будаваць для самой сабе дамы, палацы і дарогі. Ня здольная прыбіраць сьмецьце. Маскоўскі цмок ўсмоктвае сотні тысячаў няшчасных людзей з разбураных расейскім імпэрыялізмам краінаў, каб эксплюатаваць, ненавідзець і нішчыць іх. І ў той жа час монстр хоча спаць спакойна, стрыгчы купоны ды з крамлёўскага пагорка палохаць сваёй магутнасьцю ўвесь сьвет. Толькі не бывае шчасьця і спакою на няшчасьці і рабскай працы іншых народаў.
Увечары 7 сьнежня ў Маскве “правыя дэмакраты” прынялі гістарычнае рашэньне. Партыя “Наш выбар” пад кіраўніцтвам Хакамады прагаласавала за ўзьяднаньне з “Дэмакратычнай партыяй” Мішы Два Працэнты (як называе народ М. Касьянава, якога крамлёўскі рэжым вымушаны быў прыбраць пазалетась, бо “браў надта шмат”). “Правыя” працягваюць свае карнавальныя шоў-акцыі, дэманструюць усяму сьвету – ёсьць сапраўдныя дэмакраты ў Расеі, вось і злучацца пачалі. Прапануем у гонар японкі Хакамады і мафіёзы Касьянава назваць новую партыю ясна і адпаведна – Якудза. Як жа яны ўсе падобныя – яўлінскія-лебедько, хакамады-абрамавы, мілінкевічы-жырыкі, калякіны-зюганавы. Усё – адна падстаўная кодла.
У Маскве радуюцца, паказалі брытанцам “кузькіну мать”. 8 сьнежня мінабароны Брытаніі абнародвала вынікі камісіі, якая рассьледвала прычыны гібелі 10 брытанскіх жаўнераў, вэрталёт зь якімі разьбіўся ў Іраку 30 студзеня 2005 г. Камісія ўрэшце даказала, што катастрофу выклікалі не тэхнічныя непаладкі. Вэрталёт быў зьбіты з расейскага буйнакалібэрнага зянітнага кулямёта ДШК. Эх, як разьвесялілася Масква: “Нашему пулемёту сто годов, а как даёт! Знай нашіх!” Сапраўды, ДШК быў сканструяваны ў адной з майстэрняў ГУЛАГу яшчэ ў 1938 г. І, як паведамляла мінабароны РФ, гэтая мадэль даўно зьнята з узбраеньня расейскай арміі. Рана радуюцца гледачы расейскага Калізэя, назіраючы за гібельлю чужых гладыятараў на арэне. Можа хаця б цяпер народ і эстэблішмэнт Вялікай Брытаніі зразумеюць, каго, якога бандыта яны называюць сваім сябрам і дэмакратычным хаўрусьнікам. Можа зразумеюць, хто адгрузіў ірацкаму тэрарыстычнаму рэжыму сваё забойчае сьмецьце (разам з сучаснай зброяй)? Можа пратруць вочы ды заўважаць, як ціхай сапай і без лішняга шуму міністар вайны РФ Іваноў зрабіўся нядаўна віцэ-прэмьерам ураду РФ, як гэты ўрад ўзяўся за мадэрнізацыю іранскіх ракетных войскаў. Як Расея разгортвае на тэрыторыі Беларусі свае ваенныя магутнасьці (а Беларусь, як вядома, знаходзіцца ў цэнтры Эўропы і надта ж блізка ад Брытаніі)?
8 сьнежня скончыўся суд над “лімонаўцамі”. Так называюць шумную групоўку пад назвай НБП – Нацыянал-бальшавіцкая партыя пад кіраўніцтвам Э. Лімонава. ФСБ даўно стварыла і хватка кіруе дзеяньнямі правакатараў. Акрамя чалавеканенавісьніцкай і фашыстоўска-бальшавіцкай прапаганды, гэтая групоўка рэгулярна выконвае гэбоўскія заданьні пад гітлерска-савецкай сімволікай. Так, 14 сьнежня 2004 г. 39 маладзёнаў уварваліся ў Маскве у грамадзкую прыёмную адміністрацыі прэзыдэнта РФ, разгарнулі транспарант “Путин, уходи сам!”, пакуражыліся і былі затрыманы міліцыяй. Спачатку суд іх абвінавачваў у “спробе гвалтоўнага захопу ўлады, пашкоджаньні дзяржмаёмасьці і вандалізьме”. Апошнім часам абвінавачваньні зьмякчылі да “хуліганскіх дзеяньняў”, а сёньня далі ад 1,5 да 3 гадоў турмы васьмі правакатарам, а астатніх адпусьцілі з умоўнымі выракамі. Перад будынкам суда лімонаўцаў актыўна падтрымліваў пікет ад зьліквідаванай нядаўна партыйкі “Родіна” (яшчэ адна ахвяра “рэжыму Пуціна”). У Растове-на-Доне шумелі ў знак салідарнасьці з “ахвярамі” і прыкоўвалі сабе да будынку фэдэральных уладаў яшчэ нейкія лімонаўцы. Вось і гатовы сюжэт пра “антыпуцінскую фронду” – усё непрывабныя вырадкі з гітлерска-ленінскай сімволікай. Супраць іх якраз і дзейнічаюць “дэмакратычныя ворганы пуцінскай улады”: гэбэ, міліцыя, суд, пракуратура. “¡No pasaràn!” – шумнула ў чарговы раз рамантычны лёзунг лубянская кантора. І ўсе задаволеныя, і Пуцін барбу супраць фашызма вядзе. Будзе пра што расказаць Блэру, Барозу і Кофі Анану.

Янка Базыль

10/12/2005 › Актуаліі