Маскоўскія кланы “на нажах”

Расейскія тэлеканалы пачынаюць свае выпускі навінаў з хакейных перамогаў сваёй зборнай, украінскіх маналогаў свайго Медведева і бадзёрых выступаў на розныя тэмы свайго Пуціна. Галоўнае – сацыяльна-палітычны аптымізм, “не надо печаліться – вся жізнь впереді…” За тэлешырмай, аднак, хаваюцца трагедыі і драмы неабсяжнай імпэрыі. Час ад часу інфармацыя аб іх прарываецца праз заслонку. І тады сэрца беларуса сьціскаецца ад паведамленьняў пра цэлы дзіцячы садок, які атруціўся ў Хабараўскай вобласьці неякаснымі прадуктамі (якасныя былі скрадзены адміністрацыяй), пра забойствы ў Маскве вэтэранаў вайны дзялкамі, якія прадаюць ваенныя ўзнагароды і г.д. Інфармацыя, зь якой мы хочам вас пазнаёміць, не гучала з афіцыйных рупараў імпэрыі. Яе падае расейскае інтэрнэт-выданьне Grani.ru. Гэтым разам мы ўпэўнены, што ў беларусаў ня ўзьнікне спачуваньня да галоўных фігурантаў канфліктнай справы — Жырыноўскага і Лужкова. Таму што ўсе без выключэньня фігуранты – паханы маскоўскіх дзяржаўна-мафійных кланаў, дзеячы, якія на працягу гадоў разбудоўвалі непараўнальную па маштабах і не падпольную па характару мафійную канструкцыю. Яны прыклалі шмат намаганьняў, каб наша Беларусь стала васальнай правінцыяй іхнага злачыннага сіндыката. Але трэба прызнаць, што на самой справе яны зрабілі значна больш шкоды і натварылі бяды менавіта расейскаму народу, які за гэта люта ненавідзіць іх у прыватнасьці і мафіную Маскву ў цэлым.

Янка Базыль

***

Мітволь просіць Іспанію і Кіпр арыштаваць нерухомасьць і рахункі Жырыноўскага

Прэфэкт Паўночнай адміністрацыйнай акругі Масквы Алег Мітволь зьвярнуўся ў Нацыянальны суд Іспаніі і Цэнтральны банк Кіпра з просьбай заблакаваць рахункі і арыштаваць нерухомасьць, якім, паводле ягонай інфармацыі, валодае ў гэтых краінах лідэр ЛДПР Уладзімір Жырыноўскі. Як піша “Коммерсант”, такі зварот Мітволь зрабіў з мэтай “забесьпячэньня іска” чыноўнікаў ураду Масквы супраць лідэра ЛДПР “да высьвятленьня ўсіх абставінаў па справе”. Па ягоных словах, абедзьве інстанцыі паводле закону “абавязаны зрабіць захады”, калі атрымаюць гэтыя лісты.

Канфлікт Жырыноўскага са сталічнымі ўладамі працягваецца з восені 2009 года. У кастрычніку пасля сустрэчы з прэзыдэнтам Дзімітрыем Медведевым Жырыноўскі назваў сталічны ўрад “крыніцай карупцыі”, а ягоных членаў – “круцелямі”.

28 красавіка Савелаўскі суд Масквы прызнаў гэтыя выказваньні зьневажальнымі для гонару і годнасьці мэра Юрыя Лужкова і тое, што яны падрываюць дзелавую рэпутацыю ўраду Масквы, і прысудзіў тым, хто падаў позву, па 500 тысячаў рублёў. Пасьля падобнага выступу Жырыноўскага ў Дзярждуме 20 красавіка 27 вышэйшых чыноўнікаў ураду падалі на лідэра ЛДПР іскі аб абароне гонару і годнасьці на агульную суму 13,5 мільёнаў рублёў.

У тым, што іскі будуць задаволены, Мітволь не сумняваецца: “Ва ўрадзе Масквы няма аніводнага чалавека, асуджанага за круцельства. Пра што тут гаварыць?” – сказаў ён. (Бліскучая аргумэнтацыя юрыста наконт юрыдычнай цнатлівасьці вышэйшай маскоўскай публікі – заўвага рэдактара). Тым ня менш, па словах прэфэкта, спагнаць гэтую суму з Жырыноўскага будзе праблематычна: палітык абаронены законам “Аб статусе члена Савета фэдэрацыі і дэпутата Дзярждумы”, і спагнаць сродкі можна толькі пасьля таго, як лідэр ЛДПР складзе дэпутацкія паўнамоцтвы.

“Хаця на маёмасьць або рахункі, калі яны ёсьць, у іншых краінах расейскі закон не распаўсюджваецца, — удакладніў Мітволь. – І калі мы выйграем суды, то будзем падключаць заходніх юрыстаў. Каб яны праверылі, ці існуюць там актывы, і, калі яны ёсьць, каб яны дапамаглі арыштаваць іх у забесьпячэньне іскаў”.

Камэнтар маскоўскага публіцыста Ільі Мільштэйна: У Крамлі даўно ўжо мараць пазбавіцца ад няўрымсьлівых дзеячаў цяжкай вагі. Яны проста ўжо не патрэбныя. За мінулае дзесяцігоддзе падрасьлі новыя клоўны і новыя гаспадарнікі, якія драпежна паглядаюць на вэтэранаў. Прастора для манеўра заўважна звузілася. І Жырыноўскаму з Лужковым засталося толькі таптацца на сваім пятачку і выштурхоўваць адзін аднаго з круга”.

Крыніца: http://grani.ru/Politics/m.178123.html

(Пераклад з расейскай)

19/5/2010 › Навіны