Ігуменскі Шлях

27 чэрвеня сябры Кансэрватыўна-Хрысьціянскай Партыі – БНФ правялі штогадовыя мэмарыяльныя мерапрыемствы памяці ахвяраў расейскага генацыду ў горадзе Чэрвені (былы Ігумень) Менскай вобласьці. Вялікая група сяброў Партыі прыбыла з Менска, Баранавічаў і Слуцка і распачала мерапрыемствы каля будынка былой Ігуменскай турмы, дзе расейскія акупанты вязьнілі і катавалі беларускіх патрыётаў яшчэ ў 19-м стагоддзі. Праз турму прашлі паўстанцы Кастуся Каліноўскага, адраджэнцы канца 19-га – пачатку 20-га стагоддзя. Маскоўскія акупанты савецкага пэрыяду зрабілі турму выспай Архіпелага ГУЛАГа. Тут катавалі і вязьнілі беларусаў на працягу 1917-41 гадоў. У гэтай вязьніцы каты НКВД трымалі вязьняў апошнюю ноч перад расстрэлам 26 чэрвеня 1941 г., пасьля таго, як прыгналі іх з менскай турмы. На наступны дзень расейскія акупанты пагналі калёну вязьняў па шашы ў бок Расеі і непадалёк ад Чэрвеня адкрылі агонь па людзях. Было забіта больш за паўтары тысячы людзей, толькі нямногія здолелі ўцячы і выратавацца. Злачынства маскоўскага захопніка наклалася на злачынства нямецкага захопніка нашай зямлі.

Фронтаўцы прайшлі шляхам беларускіх пакутнікаў пад нацыянальнымі Бел-Чырвона-Белымі Сьцягамі, транспарантам “Ігумен. 26 чэрвеня 1941 года. Вечная памяць ахвярам расейскай акупацыі”. На магілах ахвяраў былі ўскладзены вянкі і кветкі, запалены сьвечкі. Людзі засьпявалі гімн “Магутны Божа”. Перад грамадой выступілі сп. Юры Беленькі, выканаўца абавязкаў у Беларусі старшыні Беларускага Народнага Фронту “Адраджэньне” і КХП-БНФ, сп. Сяргей Папкоў, намесьнік старшыні Фронту і Партыі, сп. Алесь Чахольскі, адказны сакратар Фронту і Партыі, Валеры Буйвал, сакратар Фронту і Партыі. Яны казалі пра палітыку генацыду, якую праводзілі маскоўскія акупанты на беларускай зямлі. Наш народ ніколі ня выбачыць маскоўскім катам іхныя злачынствы. Масква і яе марыянэткавы рэжым у Беларусі ведаюць гэта і таму імкнуцца ўсімі фальшывымі сродкамі дэзарыентаваць людзей, прымусіць іх забыцца аб трагічнай мінуўшчыне і захапляцца новай сталіншчынай, якая ўздымаецца ў поўны рост у імпэрскай Расеі. Акупанты вязьнілі, катавалі і забівалі нашых людзей за тое, што яны былі беларусамі. Вядома, што калі напярэдадні расстрэла ў двары Ігуменскай турмы зьвяругі НКВД праводзілі “сэлекцыю” тысячаў вязьняў на “палітычных” і “крымінальных”, то ў “палітычныя” (на расстрэл) адбіралі перш за ўсё тых, хто ўмеў размаўляць толькі па-беларуску. Сёньняшні прамаскоўскі рэжым у Беларусі ўслаўляе Сталіна і сталіншчыну, будуе ўсю сваю хлусьлівую прапаганду і палітыку на ўхваленьні савецкага ладу і бальшавіцкай ідэалогіі. Рэжым цягне нас у дзікую чалавеканенавісьніцкую саўдэпію. Рэжым хацеў бы растаптаць магілы нашых пакутнікаў і прымусіць нас забыцца пра іх. Але ня ўдасца! Беларусы будуць ушаноўваць сваіх пакутнікаў. Мы зробім усё, каб жахі расейскай акупацыі не вярнуліся на нашую зямлю. Што ж трэба рабіць дзеля таго, каб гэта не паўтарылася? Беларусы павінны адвярнуцца ад рэжыму маскоўскіх прыслужнікаў-халуёў: не абслугоўваць іх, не хадзіць на іхныя пампезныя парады, не хадзіць на іхныя фальшывыя “выбары”. Трэба зрабіць так, каб рэжым ды яго псэўдаапазыцыя самы гуляліся з сваім Сталіным, сваім КГБ і сваімі выбарчымі фарсамі. Зрабіць так, каб яны ўжо не маглі прыкрыць свае крымінальныя справы мільёнамі простых людзей – грамадзянаў Беларусі. Байкот рэжыму і ягоным фальшывым “выбарам”!

У грамадзе было шмат маладых людзей і падлеткаў, якія ўпершыню пабылі на месцы Ігуменскай трагедыі. Моладзь разам з старэйшымі сьпявала патрыятычныя песьні і ваярскія гімны.

На прыканцы мерапрыемства грамада засьпявала гімн “Магутны Божа”.

Інфармацыйная камісія Кансэрватыўна-Хрысьціянскай Партыі – БНФ
27 чэрвеня 2010 г.

28/6/2010 › Навіны