Украіна бароніцца ад фальшывых чужынцаў

Як і прадчувалі ўкраінскія патрыёты, візыт начальніка РПЦ Кірыла прынёс на ўкраінскую зямлю ня мір і не лагоду. Як у вядомай рускай казцы, маскоўскі госьць пачаў выймаць з шырокіх рукавоў сваіх расшытых золатам шатаў “козыры” маскоўскай калоды і пачаў казыраць імі перад украінскім народам, народам глыбокай культурнай і рэлігійнай традыцыі. Маўляў, павяліся ўкраінцы “от русскіх” і Царква ва Украіне – “дочерняя” ад РПЦ (на слэнгу маскоўскага псэўдаправаслаўя гэта значыць – “другасная” і “падпарадкаваная”). Гісторыя маскоўскіх прэтэнзій на Украіну сягяе ў далёкія стагоддзі. Гэтых прэтэнзій не было толькі тады, калі не існавала Масквы і Масковіі. Але тады ўжо на працягу стагоддзяў існавалі вялікія цывілізацыі Украіны і Беларусі (што і ёсьць адказам на нахабнае маніпуляваньне Масквой тэрмінам “дачэрняя”).

Публікуем паведамленьні з афіцыйнага сайту партыі “Наша Украіна”.

***

Украінская царква ёсьць апостальскай і ня можа быць чыёйсьці “дачкой”

Народны дэпутат Пэтро Юшчанка перакананы, што ўкраінская царква ёсьць апостальскай і ня можа быць чыёйсьці “дачкой”. Такое перакананьне Юшчанка выказаў у камэнтары УНІАН.

“Сапраўдная гісторыя дае адказы таго, хто “маці-царква” і дзе пачатак”, — заявіў дэпутат.

Па словах Юшчанкі, першае хрышчаньне Кіеўскай Русі зьдзейсьніў не князь Уладзімір Сьвятаслававіч, а Андрэй Першазваны (Апостал Ісуса Хрыста – заўвага рэдактара).

“Богаўгоднае дзейства – Хрышчаньне Русі Уладзімірам Вялікім – было пятым. Першым хрысьціцелем нашай зямлі быў Андрэй Першазваны, які ў 57-м годзе нашай эры прыбыў на кіеўскую зямлю”, — падкрэсьліў Юшчанка.

Дэпутат нагадаў гісторыю, калі пасьля сашэсьця Сьвятога Духа апосталы кідалі жэраб, вырашаючы, куды каму ісьці прапаведваць хрыстовую веру. Андрэю Першазванаму выпала Скіфія, г. зн. землі сучаснай Украіны. Юшчанка нагадаў словы апостала Андрэя, сказаныя ім у Кіеве: “Бачыце вы гэтыя горы? На гарах гэтых зазьяе ласка Божая, будзе вялікі горад і шмат цэркваў пабудуе тут Бог”. “Гэта было нашае апостальскае хрышчаньне”, — заявіў дэпутат, дадаўшы, што Кіеўскі памесны сабор у 1621 годзе пацьвердзіў апостальскае паходжаньне хрысьціянства на ўкраінскіх землях. Акрамя таго, у звароце было сказана, што “Сьвяты Апостал Андрэй – першы арцыбіскуп Канстанцінопальскі, патрыярх Усяленскі і Апостал Украінскі. На кіеўскіх гарах стаялі ногі яго, і вочы ягоныя Украіну бачылі, а вусны багаслаўлялі, і насеньне веры ён у нас пасадзіў. Сапраўды Украіна нічым ня меншая за іншыя суседнія народы, бо і ў ёй прапаведваў Апостал”.

Юшчанка перакананы, што гэтая падзея павінна прымусіць усіх зразумець, што ўкраінская царква ёсьць апостальскай з першага стагоддзя ад Нараджэньня Хрыста, таксама як, напрыклад, Александрыйская, Антыахійская, Ерузалімская цэрквы, таксама заснаваныя Апосталамі.

Па словах дэпутата, потым было й гоцкае хрышчаньне, і хрышчаньне Аскольда, і княгіні Вольгі, і толькі потым хрысьціў Русь Уладзімір Вялікі.

У той жа час Юшчанка надае гэтаму хрышчаньню вялікае значэньне, таму што яно было фактычна дзяржаўным чынам і вялікай рэлігійнай рэформай.

“Трэба зразумець простую ісьціну, што Кіеўская царква ёсьць маці ня толькі для Маскоўскай царквы, а і для Беларускай, таму што менавіта сыны Уладзіміра паехалі з Кіева ў Пскоў і Полацк, дзе былі заснаваны гэтыя цэрквы”, — зазначыў Пэтро Юшчанка.

Крыніца: http://www.razom.org.ua/news/8983

Урокі гісторыі для Украіны
(заява партыі “Наша Украіна”)

Палітычная партыя “Наша Украіна” вітае ўсіх са сьвятам Хрышчаньня Украіны-Русі. І ў гэты дзень, сьвяткаваньне якога на афіцыйным узроўні адбываецца на аснове ўказа Віктара Юшчанкі, партыя хацела б нагадаць дзейснай уладзе пра ўрокі гісторыі. Цяперашнюю ўкраінскую ўладу чамусьці незваротна цягне менавіта да РПЦ. Відавочна, яна адчувае зь ёю духоўную блізкасьць. Ня выключана, што асновай гэтай блізкасьці ёсьць цяга да сіманіі, г. зн. да продажу пасадаў за грошы. Але калі ў далёкім 1686 годзе маскоўскія паслы за “мзду” выкупілі для РПЦ у турэцкага ўраду і тадышняга патрыярха Дзіянісія Кіеўскую мітраполію, то сёньня іхныя ідэйныя нашчадкі ва Украіне ня грэбуюць купляць за грошы сьвецкія пасады, напрыклад, “тушкі” у Вярхоўнай Радзе. Але ня трэба забывацца і на тое, што ў 1687 г. Царгародзкі (Канстанцінопальскі – заўвага рэдактара) патрыяршы Сабор асудзіў махінацыю з перадачай Маскве Кіеўскай мітраполіі як акт хабарніцтва, а самога патрыярха Дзіянісія пазбавіў патрыяршай годнасьці. Для ўладароў сучаснасьці гэта павінна стаць вельмі паказальным урокам. У пасьлядоўнікаў палітычнай “сіманіі” ва ўкраінскай палітыцы няма будучыні.
Кіеў, 28 ліпеня 2010 г.

Крыніца: http://www.razom.org.ua

29/7/2010 › Навіны