Спэцслужбы рэжыму Януковіча “перапісваюць гісторыю”

З Украіны паступаюць трывожныя зьвесткі пра станаўленьне ў краіне атмасфэры “гэбоўскай сакрэтнасьці”. Пад “каўпак” спэцслужбаў рэжыму Януковіча патрапіў вядомы львоўскі навуковец-гісторык Руслан Забілый. Ён кіруе музэйным комплексам, які знаходзіцца ў будынку былой турмы на вул. Лонцькага ў Львове. Гэта адпаведнік менскай Валадаркі – месца ўвязьненьня, пакутаў і сьмерці тысячаў і тысячаў украінскіх патрыётаў у часы маскоўскай і гітлерскай акупацыі. Старыя львавяне распавядалі беларусам, як НКВД расстрэльвала ў сутарэньнях і ў двары гэтай турмы ўкраінцаў. Каб было не чуваць стрэлаў і крыкаў ахвяраў, каты з чырвонымі зоркамі ўключалі аўтамабільныя маторы. Па вуліцы Лонцькага немагчыма было хадзіць, настолькі моцным быў трупны пах (забітых было так шмат, што іх не пасьпявалі вывозіць). Напярэдадні захопу Львова немцамі 22 чэрвеня 1941 года НКВД расстраляла ўсіх палітычных вязьняў турмы… Але за свой народ помсьцілі, білі акупантаў змагары Украінскай Паўстанцкай Арміі, якія ваявалі з саветамі да пачатку 1960-х гадоў.

Пра гэтае пакутніцтва і пра гэтае змаганьне піша ў сваіх працах гісторык Руслан Забілый. Пасьля прыходу да ўлады прамаскоўскай групоўкі Януковіча такая навуковая праца стала непажаданай. Можна не сумнявацца, што найбольш яе не жадае Масква, якая і кіруе працэсамі здушэньня ўсяго ўкраінскага ва Украіне.

Досьведу зьнішчэньня нацыянальнай навуковай думкі і гістарычнай праўды Масква набралася ў нашай Беларусі. Антыбеларускі рэжым утварыў сваю вэрсію нашай найноўшай гісторыі. На гэтай фальшывай ніве “в поте ліца трудятся” такія фальшывыя асобы, як мадам Н. Севярын і іншыя. Пра Слуцкі Збройны Чын, змагароў “Зялёнага гаю”, сёньняшні Народны Фронт і іншыя эпізоды нашага нацыянальнага змаганьня яны “вяшчаюць” з пазыцыі акупанцкага рэжыму, з антынавуковай пазыцыі. Працэс люстрацыі пакажа, наколькі ў сваіх “дасьледваньнях” гэтыя псэўдагісторыкі кіраваліся ўказаньнямі спэцоў з КГБ. Барацьба за гістарычную праўду працягваецца.

Мы публікуем артыкул журналіста Івана Фаріона з львоўскай газэты “Високий Замок” за 9 верасьня 2010 г.

***

СБУ “наехала” на дасьледчыка УПА

У палітычную паліцыю ператвараецца Служба бясьпекі Украіны. Такая выснова напрошваецца пасьля чарговага інцыдэнту з ідэалагічнай афарбоўкай, які адбыўся з удзелам гэтай дзяржаўнай спэцарганізацыі.

А 7.30 у сераду на пэроне кіеўскага вакзала шасьцёра супрацоўнікаў СБУ затрымалі пасажыра львоўскага цягніка, 35-гадовага дырэктара Нацыянальнага музэя-мэмарыяла ахвяраў акупацыйных рэжымаў “Турма на Лонцькага”, супрацоўніка Інстытута ўкраіназнаўства Руслана Забілага. Ён прыехаў у Кіеў, каб сустрэцца з калегамі ў Інстытуце нацыянальнай памяці. Не прадстаўляючыся, без якой-кольвечы санкцыі “хлопцы ў цывільным” абшукалі гісторыка, пасадзілі ў аўтамабіль і завезьлі ў офіс на вул. Валадзімірскай, 33. Там яго дапытвалі да дзесятай вечара, гэта значыць, чатырнаццаць з паловай гадзін! Забралі ноўтбук. Патэлефанаваць жонцы дазволілі толькі з дазволу нейкага вялікага начальніка, і тое баяліся, каб гісторык не прагаварыўся, дзе знаходзіцца. Добра, што хаця ў абед запрапанавалі бутэрброды. Як потым паведаміла прэс-служба СБУ, Забілый “з мэтай перадачы трэцім асобам несанкцыянавана сабраў зьвесткі, якія прадстаўляюць сабой дзяржаўную таямніцу”. Супраць навукоўца распачалі крымінальную справу “па факце падрыхтоўкі да разглашэньня” гэтай таямніцы.

Руслан Забілый пярэчыць, што ў ягоных дзеяньнях ёсьць які-небудзь крымінал, і кажа, што меў на сваім кампутары копіі рассакрэчаных СБУ архіўных дакумантаў, якія мелі дачыненьне да нацыянальна-вызвольнага руху ва Украіне, асабліва УПА. Гэтую тэму ён дасьледуе на працягу дзесяці гадоў. Зьвесткі даўно перасталі быць таемнымі, яны разьмешчаны ў адкрытым электронным архіве, знаходзяцца ў інфармацыйна-даведкавых залях СБУ, імі карыстаюцца навукоўцы, журналісты. На кампутары таксама былі навуковыя артыкулы, падрыхтаваныя да друку матар’ялы ўнікальных дасьледваньняў, якія праз два тыдні павінны вярстацца. Калі іх ня вернуць, гэта стане непапраўнай стратай для гісторыка…

“Было адчуваньне, што я мусіў адчуваць сябе нейкім шпіёнам, якога перахапілі, які кудысьці нешта вёз, — сказаў у размове з карэспандэнтам “ВЗ” Руслан Забілый. – Гэтае “нешта” вельмі доўга высьвятлялі…”
У СБУ Забілага распытвалі, хто зацьвердзіў яму такую тэму навуковай працы, цікавіліся калегамі-гісторыкамі, зь якімі ён перасякаецца ў дасьледваньні тэмы УПА (магчыма, і да іх ў хуткім часе пастукаюць у дзьверы, затрымаюць на якім-небудзь пэроне). І яшчэ казалі: можа б вы наагул ад гэтай тэмы пазбавіліся, можа і далей працавалі б настаўнікам у Запарожскай вобласьці?
У чацьвер раніцай Руслан Забілый напісаў зварот-пратэст на імя начальніка СБУ Валерыя Хорошковського. Ён патрабаваў вярнуць яму ягоныя навуковыя дасьледваньні, асабістыя рэчы. Прасіў патлумачыць, чаму ягоных супрацоўнікаў у Львове не дапусьцілі на працоўныя месцы (гэтую інфармацыю прэс-служба СБУ ў Львоўскай вобласьці адразу ж абвергла). Дырэктар мэмарыяла-музэя заклікаў спыніць цэнзуру, ціск на гісторыю і гісторыкаў.

На пытаньне карэспандэнта “ВЗ”, ці ня зьвязвае ён факт увагі да сябе з боку спэцслужбаў з новай унутранай палітыкай новай улады Украіны, Руслан Забілый сказаў: “Гэтыя дзеяньні СБУ на такую думку падштрухоўваюць. Іншых падставаў для затрыманьня я ня бачу…”

За паўгады, пакуль у кіраўніцтве СБУ стаіць Хорошковській, СБУ апынілася ў цэнтры шмат якіх палітычных скандалаў. “Тайнякі” праводзілі “прафілактычныя” размовы з рэктарам Каталіцкага ўнівэрсітэта, не пускалі ва Украіну кіраўніка фонда Конрада Адэнаўэра, які адмоўна ацэньваў дзейнасьць улады, запрашалі “на гарбату” журналістаў, цікавіліся фондам “Відроджэння”. Начальнік СБУ замешаны ў інтрыгі, зьвязаныя з пазбаўленьнем ліцэнзіяў двух апазыцыйных тэлеканалаў. А цяпер вось “пад каўпаком” апынуўся гісторык, які сьцьвярджае праўду пра УПА…

Іван Фаріон

Пераклад з украінскай

14/9/2010 › Навіны