Агляд замежнага друку

Ангельская газэта “Independent”.
11 лістапада 2010 г. Ангельская газэта “Independent” апублікавала артыкул пад тытулам “Сучаснае мастацтва было “зброяй” ЦРУ”. У 1947 г. амэрыканскае кіраўніцтва прыняло рашэньне спрыяць распаўсюджваньню ў сьвеце сучаснага мастацтва, у прыватнасьці твораў мастакоў абстрактнага экспрэсіянізма. Сярод іх былі, што кур’ёзна, вядомыя левымі поглядамі Дэксан Полак, Робэрт Мазэрвэл, Вілем дэ Кунінг. У праграме брала чынны ўдзел і ЦРУ. Мастацтва было дадатковым аргумантам у халоднай вайне супраць камуністычнага Усходу, дзе панавала афіцыёзнае мастацтва. Заходняе мастацтва павінна было прадэманстраваць свабоду творчасьці і думаньня.
Наш камэнтар: Саветы і ўвесь сацыялістычны лягер сапраўды баяліся, што заходняе мастацтва пранікне ў іхныя баракі. Нічога псіхічна нармальнага, сапраўды аналітычнага пра мастацтва 20-га стагоддзя пад саветамі не публікавалі. Існавала толькі “крытыка буржуазнай культуры”. Студэнтам мастацкіх ВНУ выдавалі спэцдазволі на прамотр альбома твораў Сальвадора Далі. “Шчасьліўчыка” запускалі ў нешта падобнае на клетку ў інстытуцкай бібліятэцы, і ён нетаропка гартаў карцінкі і “кайфаваў”. Аказваецца, нездарма саветы баяліся культурнай экспансіі з Захаду, усім камандавала ЦРУ. Толькі з сярэдзіны 80-х гадоў у СССР гэты маразм пачаў слабець, а потым і зусім сыйшоў на не. Сапраўды, заходнія “фармалісты” (як называла іх савецкая прапаганда) былі значна разнастайней і весялей, чым цёмная яма савецкага афіцыёзу.

Валеры Буйвал

***

Летувіская газэта “Lietuvos Rytas”.
11 лістапада 2010 г. Летувіская газэта “Lietuvos Rytas” пісала пра пратэсты студэнтаў у Лёндане. 50 тысячаў маладых людзей прайшлі шэсьцем праз цэнтар брытанскай сталіцы, пратэстуючы супраць урадавага пляну рэзкага падвышэньня платы за навучаньне. Потым яны штурмавалі і разграмілі штаб-кватэру кіруючай Кансэрватыўнай партыі. Падчас сутычак з паліцыяй былі паранены студэнты і паліцэйскія.
Наш камэнтар: Пры лукашызме плата за навучаньне падымалася некалькі разоў. Рэжым давёў да мізэрнага стану вышэйшую адукацыю ў краіне, зьнішчыў нацыянальную традыцыю і беларускую мову ў вышэйшай школе. ВНУ РБ ператвораны ў мясцовы варыянт правінцыйна-расейскіх інстытуцый, якія існуюць на абшарах чужой дзяржавы ад Мурманска да Камсамольска-на-Амуры. У апошнія гады гэбэ разгарнула ў ВНУ нічым не абмежаваную дзейнасьць па вярбоўцы агентуры. Устаноўлены нават пасады для гэбоўскіх афіцэраў, у іх ёсьць свае кабінэты на тэрыторыі ВНУ, дзе яны вярбуюць студэнтаў і вядуць сваю “апэратыўную працу” (трэба адзначыць, што ў дэмакратычных краінах спэцслужбам забаронена займацца вярбоўкай на тэрыторыі ВНУ). Ніякіх арганізаваных пратэстаў з боку студэнтаў практычна не было. Моладзь актыўна прыстасоўваецца да ўсё больш маразматычных абставінаў. Аднак, вядома, што прыстасаванцтвам праблема не вырашаецца.

Юрка Марозаў

***

Латвійская газэта “Diena”.
11 лістапада 2010 г. Латвійская газэта “Diena” паведаміла пра публікацыю мэмуараў прэзыдэнта ЗША Буша-малодшага. У кнізе Буш напісаў, што напярэдадні амэрыканскай інвазіі ў Ірак у 2002 г. ён правёў перамовы з тадышнім канцлерам ФРГ Гэрхардам Шродэрам. Шродэр паабяцаў падтрымаць ЗША ў гэтай ваеннай апэрацыі. Але калі інвазія пачалася, Шродэр выступіў супраць яе разам з Пуціным і французкім кіраўніцтвам.
Наш камэнтар: Пазьнейшыя падзеі паказалі ўсім, што Шродэр быў (і застаецца) на ўтрыманьні Крамля-Лубянкі. Вышэйшы нямецкі кіраўнік працаваў на карысьць чужой дзяржавы і чужой спэжцслужбы.

Юрка Марозаў

***

Румынская газэта “Evenimentul Zilei”.
11 лістапада 2010 г. Румынская газэта “Evenimentul Zilei” пісала пра сустрэчу з выбаршчыкамі ў Кішынёве Міхая Гімпу, выканаўца абавязкаў прэзыдэнта Малдовы. Гімпу сказаў у сваім выступе: “Яны – як насякомыя, што сядзяць на плячах жывёлаў. Камуністы смокчуь, смокчуць, смокчуць і смокчуць, пакуль мы маўчым. Мы павінны ўзяць молат з іхняга герба і даць ім па галаве”. Гімпу гаварыў таксама пра мімікрыю камуны, якая выходзіць на парляманцкія выбары пад нацыянальным сьцягам Малдовы: “Сьцяг Штэфана Вялікага ў руках у камуністаў, нібыта Штэфан быў некалі першым сакратаром кампартыі”.
Наш камэнтар: У Малдове адбываецца барацьба з прамаскоўскай па сутнасьці камунай, якую ненавідзіць малдаўская моладзь і думаючыя людзі старэйшых пакаленьняў. Адчуваецца, што формы барацьбы набываюць вастрыню. Народ шукае выйсьця з камуністычнага тупіка, сапраўдныя нацыянальныя лідэры кажуць людзям праўду.

Алесь Хадасевіч

***

Угорская газэта “Nepszabadsag”.
11 лістапада 2010 г. Угорская газэта “Nepszabadsag” пісала пра візыт прэзыдэнта ЗША Абамы ў Паўднёвую Карэю. У Сеуле Абама сустрэўся з амэрыканскімі вайскоўцамі і вэтэранамі Карэйскай вайны (1950-53 гг.). Прэзыдэнт казаў у сваім выступе пра справядлівую барацьбу амэрыканцаў супраць паўночнакарэйскіх камуністычных агрэсараў, якія напалі на Паўднёвую Карэю.
Наш камэнтар: Цікава, што на тэму той вайны засьвяціўся прэзыдэнт РФ Медведев. Ён быў на вайсковых могілках у Сеуле, дзе пахаваныя паўднёвакарэйскія вайскоўцы, што загінулі ў вайне. І нават усклаў там вянок. Ну, дык і трэба было сказаць аб тым, што “гэта нашы папярэднікі ў Крамлі далі загад карэйскім бальшавікам атакаваць паўднёвых суседзяў, а потым паслалі свае войскі на Карэйскую вайну…” Ён нічога не сказаў, нібыта Крэмль тут ні пры чым. Але фальшыўка…

Алесь Хадасевіч

***

Чэшская газэта “Mlada Fronta Dnes”.
11 лістапада 2010 г. Чэшская газэта “Mlada Fronta Dnes” паведаміла з Пакістана. Там у адной з вёсак была арыштавана 45-гадовая Асія Бібія, маці пяцёх дзяцей. Суседзі абвінавачваюць яе ў абразлівых выказваньнях аб прароку Мухамэдзе. Асія хрысьціянка. Жанчыны, якія працавалі зь ёю ў полі, ніколі не пілі ваду, прынесеную ёю і па-рознаму прыніжалі яе. За тое, што яна хрысьціянка. Цяпер яна за кратамі чакае на суд і сьмяротную кару. Асія адмаўляе, што паклёпнічала на мусульманскія сьвятыні. У Пакістане жывуць 3 мільёны мясцовых хрысьціянаў. Іх пераследуюць і забіваюць.
Наш камэнтар: Нагадаем, што мільёны пакістанскіх мусульманаў камфортна пражываюць у хрысьціянскіх заходніх краінах. Мясцовыя ўлады робяць шмат для таго, каб “не абражаць іхныя пачуцьці”: напрыклад, рэкамэндуюць хрысьціянам не выстаўляць на Каляды выявы Крыжа і Хрыста… Вядома, што многія з пакістанцаў актыўна ўдзельнічаюць у падрыўной і тэрарыстычнай дзейнасьці на Захадзе. Многія зь іх адкрыта выказваюць нянавісьць да ўсяго эўрапейскага, амэрыканскага, хрысьціянскага. Усё гэта гучыць, як літаратура абсурда…

Юрка Марозаў

***

Польская газэта “Gazeta Wyborcza”.
11 лістапада 2010 г. Польская газэта “Gazeta Wyborcza” напісала пра падрыхтоўку да сьвяточных мерапрыемстваў па ўсёй краіне ў гонар 92-х угодкаў незалежнасьці Польшчы (1918 год). Паўсюль адбудуцца парады, шэсьці, рэлігійныя і вайсковыя цырымоніі, канцэрты.
Наш камэнтар: Вольная краіна адзначае сваё дзяржаўнае і нацыянальнае сьвята. У Беларусі такое немагчыма без боек з паліцэйшчынай рэжыму, без гнюснай рэжымнай гэбельсаўшчыны, якая плявузгае на ўсё сьвятое і беларускае. 25 Сакавіка беларусам вельмі грунтоўна даказваюць, што яны жывуць пад акупацыяй.

Алесь Хадасевіч

***

Французкая газэта “Le Figaro”.
12 лістапада 2010 г. Французкая газэта “Le Figaro” апублікавала артыкул і нізку фотаздымкаў, прысьвечаных мэмарыяльным мерапрыемствам у гонар угодкаў Перамір’я, якое закончыла І Сусьветную вайну 11 лістапада 1918 г. Адбыўся вайсковы парад у Парыжы з удзелам кіраўніцтва краіны. У Бэльгіі людзі ўшанавалі ахвяраў першай газавай атакі ў той вайне. Нават у Аўстраліі адбыліся вайсковыя і рэлігійныя цырымоніі каля помнікаў палеглым аўстралійскім вайскоўцам Вялікай вайны.
Наш камэнтар: Толькі ў Беларусі заглушана памяць пра тую вайну, пра сотні тысячаў ахвяраў. Для антыбеларускага рэжыму яны – нецікавыя чужыя людзі, якіх даўно няма. У вызваленай Беларусі паўстануць помнікі нашым дзядам і будзе ўшанавана памяць ахвяраў і герояў Вялікай вайны.

Алесь Хадасевіч

***

Дацкая газэта “Berlingske Tidende”.
12 лістапада 2010 г. Дацкая газэта “Berlingske Tidende” напісала пра выступ амбасадара Турцыі ў Вене. Амбасадар Тэзкан абвінаваціў аўстрыйцаў у тым, што яны няветлівыя да мусульманаў і правальваюць інтэграцыйную палітыку ў сваёй краіне. Міністар МЗС Аўстрыі паскардзіўся на амбасадара кіраўніцтву Турцыі.
Наш камэнтар: Нагадваем, што з Турцыі ўцякаюць апошнія хрысьціяне (з грэцкай і армянскай абшчынаў). Большасьць іхных храмаў зачынены. Як туркі “інтэгруюцца” у Эўропе, добра вядома – арганізоўваюць у Нямеччыне, Бэльгіі і г.д. турэцкія кварталы, мястэчкі, вараць казляціну, ня вучаць мясцовыя дзяржаўныя мовы. Да таго ж яны абяцаюць, што гадоў праз 20 яны запатрабуюць, каб эўрапейцы ў сваіх айчынах “інтэграваліся” на турэцкі капыл. Кола абсурду пакрыху замыкаецца…

Юрка Марозаў

13/11/2010 › Навіны