АГЛЯД ЗАМЕЖНАГА ДРУКУ

(26-27.08.2013)

Падзеі ў Сірыі

26 жніўня 2013 г. нідэрляндская газэта “De Telegraaf” паведаміла пра заяву дзяржсакратара ЗША Джона Кэры. Ён заявіў, што ўрад ЗША абвінавачвае сірыйскі ўрад ў злачынным прымяненьні хімічнай зброі супраць мірных жыхароў, у выніку чаго загінулі сотні людзей.

Наш камэнтар: У сувязі з новым маштабным злачынствам тыраніі супраць сірыйскага народу дэмакратычныя краіны разглядаюць плян ваеннага ўмяшальніцтва ў Сірыі. Ня ўсе гэта кажуць, але ўсе ведаюць і разумеюць: хунта Асада трымаецца выключна на падтрымцы гэбоўскай Масквы. Удар па Асаду будзе ўдарам па імпэрскіх інтарэсах Крамля.
Алесь Хадасевіч

***

Змаганьне неграў у Амэрыцы

27 жніўня 2013 г. швайцарская газэта “Neue Zuercher Zeitung” напісала пра 50-ю гадавіну гістарычнага негрыцянскага марша на Вашынгтон. Сотні тысячаў людзей ішлі з розных канцоў краіны пад лёзунгам “Працы і свабоды”. У цэнтры сталіцы яны правялі мітынг, на якім выступіў негрыцянскі лідэр Марцін Лютэр Кінг. Менавіта тады ён сказаў сваё знакамітыя словы: “I have a dream” (“У мяне ёсьць мара”). Амэрыканцы лічаць той дзень пераломным у змаганьні неграў за роўнасьць у ЗША.

Наш камэнтар: Амэрыканскія негры паказалі яшчэ раз: дамагаецца свайго толькі той, хто вядзе змаганьне.

Алесь Хадасевіч

***

Ліберальны Вавілон

27 жніўня 2013 г. бэльгійская газэта “La Libre Belgique” напісала пра драму, што адбылася ў мястэчку Трап непадалёк ад Парыжа. Пасьля сёлетніх сутычак мусульманскай моладзі з паліцыяй у Трап трымаецца напружаная атмасфэра. 16-гадовая ліцэістка (у традыцыйнай вопратцы) выкінулася з 4-га паверху пасьля таго, як невядомыя крычалі ёй ісламафобскія выразы з машыны і зьехалі. Стан дзяўчыны крытычны.

Наш камэнтар: Розныя цывілізацыі ня здольныя мірна суіснаваць у адным месцы. У выніку фальшывага інтэрнацыяналізма лібэралаў Эўропа патанае ў нянавісьці.

Алесь Хадасевіч

Канфіскавалі груз

27 жніўня 2013 г. славацкая газэта “SME” напісала, што на пачатку сёлетнега красавіка ўлады Паўночнай Карэі спрабавалі правезьці ў Сірыю вялікую колькасьць газавых масак і зброі для рэжыма Асада. Турэцкія службы спынілі і канфіскавалі груз.

Наш камэнтар: Як заўсёды, супраць народнага змаганьня ўтвараецца хаўрус: Масква і драбнейшыя пачварныя тыраніі.

Алесь Хадасевіч

***

Саюзьнікі Масквы

27 жніўня 2013 г. польская газэта “Rzeczpospolita” паведаміла, што Расея плаціць невялічкім ціхааакіянскім дзяржаўкам, каб тыя падтрымалі кандыдатуру Екацерынбурга для правядзеньня там сусьветнай выставы Экспо-2020. За Расею будуць галасаваць Навуру, Усходні Цімор, Тувалу, Палаў і шэраг іншых экзотаў.

Наш камэнтар: З чым мы Маскву і віншуем. Нават у такой справе ня могуць адмовіцца ад крымінальных прыёмаў.

Юрка Марозаў

***

Мафія разьбіраецца

27 жніўня 2013 г. летувіская газэта “Respublika” напісала пра арышт у менскім аэрапорце кіраўніка “Уралкалія” Уладзіслава Баўмгэртнэра, якому пагражае турма на 10 гадоў. Арышт адбыўся пасьля яго сустрэчы з прэм’ерам РБ Мясніковічам. Газэта паведаміла пра “напружаньне паміж Масквой і Менскам” у сувязі з арыштам. Цытуем далей: “Крыніцы газэты ў Менску мяркуюць, што “санкцыянаваць такія дзеяньні мог толькі адзін чалавек – прэзыдэнт Беларусі Аляксандр Лукашэнка”.

Наш камэнтар: З “крыніцамі” віленскай газэты ўсё зразумела, гэта ёсьць кіруемыя і залежныя крыніцы. Цьвярозыя людзі ўпэўнены, што згаданы арышт ёсьць санкцыянаваны Масквой, адбываецца чарговы перадзел маёмасьці і замена кіруючых кадраў. Такіх “напружанасьцяў” і нават “войнаў” паміж крамлёўскім сюзэрэнам і менскім васалам мы пабачылі ўжо шмат. Усё раскрывалася потым, як сумесная маніпуляцыя на карысьць інтарэсаў Масквы.

Юрка Марозаў

1/9/2013 › Навіны