Bielarus.net
Плятформа «Беларуская Салідарнасць»
Плятформа «Беларуская Салідарнасць»
|
|
||
|
|||
|
Bielarus.net Плятформа «Беларуская Салідарнасць» |
||
|
Анэксія Азоўскага мора прывядзе да страты паўднёва-ўсходняй Украіны або пачатку вайны Радыё Рацыя
Наш калега Кастусь Багушэвіч у праграме «Госць Рацыі» закрануў гэтыя тэмы ў размове са старшынём Кансерватыўна-Хрысціянскай партыі Беларускі народны фронт Зянонам Пазьняком. РР: Як вы ацэньваеце сітуацыю з Украінай? Расея ідзе на канкрэтнае абвастрэнне канфлікту? Зянон Пазьняк: Я лічу, што гэта працяг анэксіі Азоўскага мора. Пачалася яна з будаўніцтва моста. Бо лагічна гэты мост не трэба будаваць: ён доўга там стаяць не будзе. Іншая рэч – невядома, калі ён пачне разбурацца. Тым не менш, яны пачалі яго будаваць. Хутчэй за ўсё, гэта не ёсць будаўніцтва такога стратэгічнага плана, а хутчэй тактычнага. Выдаткоўваюцца грошы, мост будуецца, ствараецца магчымасць перакрыць пратоку. Па-першае, яны абнізілі вышыню моста: вялікія караблі ўжо не пройдуць. Па-другое, усё гэта спрасціла перакрыццё пратокі там. І гэты выпадак паказвае, што гэта другі этап, які звязаны з тым, што сусветная грамадскасць зараз занятая сама сабой, рашучых палітычных лідараў у свеце няма, акрамя Трампа. Магчыма, тут ёсць разлік, што гэта неяк сцерпіцца. І тады пачнецца трэці этап. А што гэта такое для Украіны – кожны цудоўна разумее. Усе гэтыя парты, асабліва Марыупаль, проста задыхаюцца. І тады праблема захапіць усё ўзбярэжжа і Марыупаль – гэта праблема тэхналогій і часу. Рэакцыя сусветнай грамадскасці на тое, што адбылося, даволі стрыманая. А насамрэч гэта вельмі сур’ёзна, бо тут парушана міжнароднае права аб пралівах. Гэта вельмі важнае права, якое датычыць літаральна ўсіх краін. І тут мае месца прэцэдэнт, калі гэтае права парушана: адна дзяржава ў нейтральных водах абстраляла караблі другой дзяржавы. Гэта акт агрэсіі, які таксама прапісаны ў міжнародным праве. Мала за тое, у дадатак не прапускаюцца караблі праз праліў, у той час калі існуюць міжнародныя пагадненні і канкрэтнае пагадненне паміж Украінай і Расеяй 2003 года. Таму тут у Масквы няма ніякіх аргументаў, акрамя хлусні і прапаганды. Прайшло ўжо дастаткова часу, а ніякіх дзеянняў не робіцца, няма санкцый. Таму я гляджу на гэтую справу вельмі трывожна, бо фактычна гэта пачатак новага этапу захопу Украіны з боку Расеі, новы этап расейскай агрэсіі. Зараз сусветная грамадскасць перадусім займаецца тым, каб вызвалілі захопленых маракоў. Гэта правільна, гуманна. Але галоўнае пытанне ў тым, што пачаўся новы акт агрэсіі. Гэта трэба спыніць, бо тут уся Украіна пад пагрозай. Таму пакуль усё круціцца вакол маракоў і суда над імі, акупацыя будзе працягвацца. Калі анэксія Азоўскага мора застанецца, як засталася анэксія Крыма, то для Украіны гэта будзе абазначаць фактычна магчымасць страты паўднёва-ўсходняй Украіны альбо пачатак вайны. А Пуцін здольны на ўсё. РР: Амаль 5 гадоў на ўсходзе Украіны ідуць баявыя дзеянні, гінуць людзі за тэрытарыяльную цэласнасць краіны. Натуральна, што тут не выпадае чакаць і арыентавацца на тое, што скажа Еўропа ці ЗША. Тут трэба вымагаць канкрэтных рашэнняў ад украінскага кіраўніцтва. Тым часам Пятро Парашэнка толькі зараз задумаўся і ўвёў рэжым ваеннага стану ў краіне, хоць многія кажуць, што было варта гэта рабіць неадкладна, калі толькі анэксавалі Крым, калі палезлі на Данбас. Зянон Пазьняк: Канешне, варта было. Але людзі робяць жыццёвыя памылкі, прычым масава. А быць разумным заднім розумам – гэта тыповая з’ява для чалавечага інтэлекту, чалавечага існавання. Тады была зусім другая сітуацыя. Па-першае, эфект нечаканасці. Ніхто не мог паверыць, што такое пачалося. Па-другое, поўная негатоўнасць Украіны – ні псіхалагічная, ні збройная. У краіне не было гаспадара, не было каму рашаць. Калі б у Крыме было супраціўленне, то ўся гэтая авантура правалілася. Таму цяжка сказаць, што паступілі няправільна. А ўмовы якія былі?! Таму б я не стаў нікога вінаваціць. Што датычыць цяперашняй сітуацыі, то, як я казаў яшчэ 5 гадоў таму, задача Расеі – зрабіць язву ў Данбасе, як з Сірыяй. Яны зробяць язву, якая не будзе загойвацца. Для Расеі гэта будзе зручна: туды яны будуць скідаць сваю старую амуніцыю і зброю, і ўсіх падонкаў там збяруць. У Расеі крымінальнікаў поўна, таму туды іх і пашлюць, каб там стралялі і здыхалі. Ва Украіне няма рашучых стратэгаў, якія б узялі на сябе такую справу. Ну, такая сістэма, такая дэмакратыя. І гэта вельмі недасканалая сістэма ва ўмовах ваеннага стану. Я лічу, што Украіну няма ў чым вінаваціць. Яна сябе паводзіць гераічна, мужна, дзе ўсё, канешне, трымаецца на народзе, на людзях. Больш вінавата міжнародная супольнасць, асабліва Еўропа, якая недаацэньвае небяспекі, якая ўзнікла ва Украіне. Зянон Пазьняк: Насамрэч яна пастаянна існуе. Для Расеі гэта зручна, выгодна. Таму такая палітыка будзе працягвацца. Зразумела, тут ёсць разуменне таго, што гэта небяспечна як асабіста для начальніка, так і для ўсёй краіны. Таму вялае супраціўленне будзе весціся з боку гэтых рэжымных уладаў, але паўтараю – вялае. Бо гэтае супраціўленне не абгрунтавана нацыянальнымі інтарэсамі – яно абгрунтавана асабістымі інтарэсамі ўладаў, якія цалкам залежныя ад Пуціна і яго крэдытаў. І ў Беларусі няма ніякай міжнароднай падтрымкі. Таму калі пытанне ўзнікне вельмі востра, то Масква проста змусіць гэтага кліента зрабіць тое, што яна захоча. Вось у гэтым і ёсць небяспека для нас усіх. Гутарыў Кастусь Багушэвіч, Беларускае Радыё Рацыя 7/12/2018 › Навіны |
Навіны ‹ Пошук:Каляндар:Ідзі і глядзі:НАРОДНАЯ ПРАГРАМА «ВОЛЬНАЯ БЕЛАРУСЬ» С. Навумчык. «Сем гадоў Адраджэньня, альбо фрагмэнты найноўшай беларускай гісторыі (1988-1995)» З. Пазьняк. «Прамаскоўскі рэжым» Зянон. Паэма «Вялікае Княства» З. Пазьняк. «Развагі пра беларускія справы» Курапаты — беларуская сьвятыня Збор фактаў расейскага тэрору супраць беларусаў З. Пазьняк. «Беларуска-расейская вайна» «Гутаркі з Антонам Шукелойцем» (PDF)
Беларуская Салідарнасьць:ПЛЯТФОРМА НАРОДНАГА ЯДНАНЬНЯ. 1. Беларуская Салідарнасьць гэта ёсьць плятформа Беларускага Адраджэньня, форма ідэйнай лучнасьці паміж беларусамі і пазыцыя змаганьня з акупацыйным антыбеларускім рэжымам. Яе дэклярацыя салідарнасьці простая і надзейная, па прынцыпу Каліноўскага: 2. Зьместам беларускага яднаньня ёсьць Беларуская нацыянальная дзяржава. Сымвалам Беларускай дзяржавы ёсьць нацыянальны Бел-Чырвона-Белы Сьцяг і гэрб Пагоня. 3. Беларуская Салідарнасьць стаіць за праўду Беларускага Адраджэньня, якое кажа: «Не правы чалавека — галоўнае для беларусаў, а незалежнасьць і свабода, бо не бывае „правоў чалавека“ пад акупацыяй». Трэба змагацца за свабоду і вызваленьне Беларусі, а не прасіць «правоў» у рэжыма і акупантаў. Акупанты правоў не даюць. Яны пакідаюць нам «права» быць рабочым матэрыялам дзеля іхных імпэрскіх інтарэсаў. 4. Беларуская Салідарнасьць сцьвярджае і абараняе дэмакратычныя каштоўнасьці народнага агульнанацыянальнага кшталту, якія мусяць шанаваць і бараніць усе беларусы перад небясьпекай агрэсіўнай пагрозы з Расеі і перад палітыкай антынацыянальнага рэжыму Лукашэнкі на Беларусі. 5. Беларуская Салідарнасьць мацуе грунт, кірунак дзеяньняў і ідэі беларускага змаганьня ў абарону беларускай незалежнасьці, мовы, культуры, беларускай нацыянальнай уласнасьці, маёмасьці і беларускай дзяржаўнай сістэмы дэмакратычнага існаваньня нацыі. 6. Усіх беларусаў як нацыю злучае і яднае беларуская мова, беларуская гісторыя, беларуская зямля, беларуская культура, беларуская дзяржава і ўся беларуская супольнасьць людзей — Беларускі Народ. 7. Усе беларусы, незалежна ад сьветапогляду і палітычных кірункаў, яднаюцца дзеля абароны беларускіх каштоўнасьцяў, беларускіх сымвалаў і беларускіх нацыянальных інтарэсаў. 8. Формы дзейнасьці Беларускай Салідарнасьці могуць быць рознымі, але заўсёды павінна ўлічвацца антыбеларуская палітыка прамаскоўскага рэжыму на Беларусі і пагроза нашаму нацыянальнаму, культурнаму і дзяржаўнаму існаваньню. Таму ва ўсіх справах — Беларусь перад усім. Трэба шанаваць усё беларускае. Шанаваць беларускую дзяржаўнасьць. Шанаваць беларускую мову і беларускі народ. Шанаваць беларускую зямлю і беларускую культуру. Шанаваць здабытак народнай працы. Беларус беларуса мусіць бараніць перад небясьпекай. Беларус беларусу мусіць дапамагаць. Беларус беларуса павінен падтрымліваць паўсюдна на Беларусі і ва ўсім сьвеце. Сябры й партнэры:
|
Беларуская Салідарнасьць // 2000—2024 |
