ЗЯНОН ПАЗЬНЯК: ПАГРОЗА ІНТЭРВЕНЦЫІ

Беларускі Нацыянальны Сакратарыт “Вольная Беларусь” 31-га жніўня зьвярнуўся да краінаў-гарантаў суверэнітэту Беларусі, Злучаных Штатаў Амэрыкі і Злучанага Каралеўства Вялікабрытаніі і Паўночнай Ірляндыі са зваротам па забесьпячэньні суверэнітэту Рэспублікі Беларусь і прадухіленьні інтэрвенцыі з боку Расеі.

Зварот выкліканы заявай прэзыдэнта РФ У. Пуціна аб падрыхтоўцы рускай сілавой “рэзэрвы” для інтэрвенцыі ў Беларусь па просьбе А. Лукашэнкі.

У звароце адзначана, што “27-га жніўня Прэзыдэнт Расейскай Фэдэрацыі Ўладзімер Пуцін заявіў, што па яго ўказаньні падрыхтаваны паліцэйскі, сілавы ўзброены кантынгент, які па просьбе дыктатара Аляксандра Лукашэнкі гатовы ўступіць на тэрыторыю Рэспублікі Беларусь, каб душыць дэманстрацыі беларускага народа супраць дыктатара Луашэнкі, які сфальсіфікаваў выбары і ня можа быць прэзыдэнтам Беларусі.

Гэта ёсьць рэальная пагроза суверэнітэту Рэспублікі Беларусь і намер акупацыі краіны з боку Расеі.

Паводле Будапэшцкага Мэмарандума, прынятага на 52 Саміце АБСЭ 5 сьнежня 1994 года Беларусь адмовілася ад ядзернай зброі і пад гарантыі яе суверэнітэту з боку Вялікіх Дзяржаў далучылася да дамовы аб нераспаўсюджаньні ядзернай зброі (NRT) на фармальнай цырэмоніі 5-га сьнежня з удзелам прэзыдэнтаў Біла Клінтана, Барыса Ельцына і прэм’ера Джона Мэйджара.

Пункт 1 Мэмарандуму сьведчыць, што “Злучаныя Штаты Амэрыкі, Расейская Фэдэрацыя і Злучанае Каралеўства Вялікай Брытаніі і Паўночнай Ірляндыі пацьвярджаюць іхныя абавязацельствы да Рэспублікі Беларусь у адпаведнасьці з прынцыпамі Заключнага Акту АБСЭ паважаць незалежнасьць, суверэнітэт і існуючыя межы Рэспублікі Беларусь”.

У пункце 2 Мэмарандуму адзначаецца, што “ЗША, РФ і Злучанае Каралеўства пацьвярджаюць іхныя абавязацельствы не прыбягаць да пагрозаў выкарыстаньня сілы супраць тэрытарыяльнай цэласнасьці або палітычнай незалежнасьці Рэспублікі Беларусь і тое, што ніякі від іхняй зброі ніколі ня будзе выкарыстаны супраць Рэспублікі Беларусь”.

У пункце 6 засьведчана, што “ў выпадку, калі ўзьнікне сітуацыя, якая паставіць пытаньні адносна гэтых абавязацельстваў, ЗША, РФ і Злучанае Каралеўства будуць праводзіць кансультацыі”.

Асаблівасьць сітуацыі ў тым, што пагроза зыходзіць ад адной з дзяржаваў-гарантаў суверэнітэту Беларусі, якой наша краіна перадала атамную зброю (Расеі). У 90-я гады ў беларускай камуністычнай адміністрацыі, яка ацалела пасьля нацыянальнай рэвалюцыі 1988-1991 гг., былі асобы, якія не ўхвалялі перадачы ядравых ракет у Расею. Луашэнка, стаўшы прэзыдэнтам, хацеў затрымаць перадачу, але яму тое не ўдалося (яго проста апярэдзілі). Можна ўявіць, што сталася б, калі б стратэгічныя атамныя ракеты засталіся б пад уладай вар’ята.

Цяпер небясьпека пагражае ўсяму беларускаму народу. Падпісанты звароту выказваюць спадзяваньне, што ” краінамі-гарантамі ЗША, РФ і Злучаным Каралеўствам будуць зробленыя захады па забесьпячэньні гарантый суверэнітэту Рэспублікі Беларусь, каб прадухіліць пагрозы Беларусі і намеры інтэрвенцыі з боку Расеі.”

1 верасень 2020 г. Зянон Пазьняк

2/9/2020 › Навіны, Зянон Пазьняк